iFM Laoag – Inpabuya dagiti nagduduma nga ub ubbing iti siudad ti Laoag dagiti arwatda nga addaan tema iti paskua wenno awaganda iti “Walking Decoration.”
Nagbalin a sangapulo ket dua dagiti kategoria wenno simbolo iti paskua a naglalabanan dagiti ub ubbing: Bell, Card, Christmas Tree, Candle, Ponseittia, Gift, Star, Santa Claus, Kings, Shepherds, Angels, ken Holy Family.
Segun kenni City Social Welfare and Development Officer in Charge (CSWD OIC) Mrs. Perlita Cabello, umabot ti agarop siam a pulo ket walo (98) iti bilang dagiti ub ubbing a nakipagpartisipar iti daytoy nga actibidad.
Kinunana a dagiti amin a Barangay iti siudad ket nakipagpartisiparda ken kinaagpaysoananna addada pay Barangay a dua ti entryda wenno dua ti ubbingda a naarwatan wenno nadecoraran iti tema ti paskua.
Innayunna a daytoy nga actibidad ket iti panangidadaulo ti local a gobierno iti siudad babaen ti panangimatmaton ni Laoag City Mayor Michael Marcos Keon ken iti tulong ken kooperasion ti Laoag City Tourism Council ken iti biang ti CSWD.
Naikkan ti award dagiti amin a napadayawan iti kapipintasan ti arwat. Tallo ribo a pisos (P3,000) iti maikatlo a pwesto, uppat a ribo a pisos (P4,000) para iti maikadua a pwesto, idin to nga innem a ribo a pisos (P6,000) iti umuna a pwesto. Nakaawat met ti consolation prize dagiti saan a naipabilang iti nadakamat a pwesto.
Daytoy nga actibidad ket paset paylaeng iti joint Christmas Lightning wennu pannakapasilaw ti Christmas Tree iti siudad ti Laoag ken iti Capitolio Provincial. (Joe Anne Agustin, RMN News)
