Manila, Philippines – Hinikayat ng Department of Tourism (DOT) ang mga bakasyunista na bisitahin ang iba pang mga tourist destination sa Western Visayas.
Ito ay kasunod na rin ng pansamantalang pagpapasara sa Boracay Island na isa sa pinakadinarayong atraksyon tuwing summer season.
Ayon kay DOT-6 regional director Atty. Helen Catalbas, nag-abiso na siya sa mga tourism officer na tiyaking malinis at ligtas ang mga destinasyon sa kani-kanilang probinsya para sa inaasahang pagdagsa ng mga turista.
Panawagan pa niya, huwag mag-focus sa bilang ng mga turista sa halip ay isipin kung paano mapangangalagaan ang mga destinasyon.
Kasabay nito, nagpahayag ng matapang na saloobin si Catalbas sa mga pulitikong ginagamit ang turismo tuwing eleksyon.
Aniya, dismayado siya sa ilang pulitikong laman lagi ng plataporma ang turismo pero wala namang nagagawa matapos manalo.
