General Santos City—Patay ang usa ka pasyenti nga sakay sa usa ka ambulance samtang angol ang driver sa ambulansya human giratratan sa wala mailhing mga suspetsado alas 9:10 ang takna kagabie, October 2, 2018 sa may Marañon Vill., Barangay Zone III, Koronadal City.
Giila ang biktimang namatay nga si Arlan Macabangin Mangudalat, 45 anyos, residenti sa Purok Kalamunding, Brgy Lapu, Polomolok. Samtang ang angol si Dexter Buaya Jacodan, 40, driver sa Ambulance ug residenti sa Brgy. Palkan, Polomolok, South Cotabato.
Sa initial investigation nga gipahigayon sa Koronadal PNP nasuta nga gikan sa usa ka ospital ang Biktima sakay sa ambulance nga gimanihuan ni Jacodan padulong unta sa South Cotabato Provincial Hospital apan pag abot sa may Block 1, Marañon Village, Brgy Zone III usa ka Toyota van ang kalit nga miharang sa dalan dayon duha ka mga suspetsado ang minaog ug miduol ngadto sa mga biktima.
Nangutana pa ang usa sa mga suspek ngadto sa inahan sa biktima kung kini ba si Arlan Mangudalat ug dihang gikumperma sa inahan wala nay sulti-sulti ang mga suspek giratratan ang biktima atubangan mismo sa iyang inahan gamit ang tag-as nga kalibre sa armas.
Nakaangkon usab ug samad ang driver human nga naigo sa pagratrat sa mga suspek, paspas usab nga misibat ang mga sad-an samtang ang mga biktima gidala sa South Cotabato provincial Hospital apan gideklarang Dead On arrival si Mangudalat.
Nasayran nga si mangudalat ang una na usab nga gipusil sa wala mailhing suspek sa lungsod sa Polomolok usa ka bulan na ang nakalabay apan nigawas gilayon sa ospital luyo paman sa iyang samad.
Subli kining giadmitar tungod na-infection ang samad niini, dad-on unta kini sa South Cotabato provincial Hospital aron didto i-admit apan walay swerting gitiwasan sa mga suspek. (Rose Sioco)
