Patay ang duha ka mga negosyante sa nagluntad nga pagpangluthang sa Purok Maligaya, Barangay Bukay Pait, Tantangan, South Cotabato,pasado alas 9:00 kahapon sang aga.
Ginkilala ang mga biktima kanday Ronaldo Rivera Bucanig, 44-anyos, residente sang Barangay New Isabela kag Joel Macay Santiago, 41 -anyos, residente sang Barangay New Carmen, Tacurong City, pareho motorcycle dealer.
Base sa ila imbestigasyon suno kay Police Sr. Inspector Ian Bagot, Chief of Police sang Tantangan PNP, halin sa Tacurong City kag magapadulong kuntani sa syudad sang Koronadal ang mga biktima sakay sa motorsiklo sang luthangon sang mga suspek nga sakay man sa motorsiklo nga wala sang plaka.
Dead on the spot si Ronaldo Bucanig tungod sa naangkon nga igo sang bala sa mga nagkalain-lain nga parte sang iya lawas, samtang si Santiago ang nadala pa sa hospital apang ginbawian man sang kabuhi samtang ginapaidalom sa medikasyon.
May kahilabtanan naman sa trabaho sang duha ka mga biktima ang ginalantaw nila nga motibo sa nasambit nga insidente, suno kay PSI Bagot.
Nahibaluan nga bag-o pa man ang insidente kahapon nga adlaw nauna na nga ginluthang sa syudad sang Tacurong si Bucanig kag maswerte naman nga nakaluwas.
Sa subong nakilala na ang isa sa suspek sa pagpatay sa mga biktima matapos nga nagsanto man ini sa ginpablotter nga suspek ni Bucanig sa Tacurong City Pnp sang una ini nga luthangon.
