Tapaz, Capiz – Patay ang 31-anyos nga lalaki matapos nga ginluthang sang wala pa makilala nga suspek. Ginkilala ang biktima sa kay Larry Flamiano sang Barangay Taslan, Tapaz, Capiz. Nag-angkon sang apat ka mga patal nga igo sang bala sa lawas si Flamiano nga gintunaan sang iya kamatayon samtang ginabulong sa ospital.
Sa inisyal nga imbestigasyon sang Tapaz PNP, nagainum ang biktima kaupod ang mga abyan sa balay ni Rodulfo Valderama sang nabatian sini nga may nagapanitsit. Sa katuyuan nga hibaluon kun sin-o ang nagpanitsit, nagguwa sa balay ang biktima. Nakibot na lamang ang mga kaupdanan sang biktima sang nabatian nila ang madamo nga lupok kag ginsundan ini sang pagkatumba ni Flamiano.
Gindala pa sa ospital ang biktima apang ginbawian ini sang kabuhi. Sa subong, napadayon pa ang imbestigasyon sang kapulisan, agud hibaluon kon sin-o ang responsable nga nagluthang sa biktima kag ano ang motibo sa krimen.
(photo from web)
