Panay, Capiz – Patay ang 41-anyos nga mister matapos nga nabunggoan sang motorsiklo ang ginamaneho sini nga traysikol sa Barangay Cabugao Oeste, banwa sang Panay.
Wala gid makasalbar ang biktima nga ginkilala kay Ricky Bocala y Dollete, residente sang Barangay Linateran, Panay, Capiz matapos ini ang nag-angkon sang gas-gas kag kapilasan sa kalawasan resulta sang aksidente.
Suno sa imbestigasyon sang kapulisan sa Panay PNP, magaliko na kuntani padulong sa Barangay Calapawan ang biktima sakay sa traysikol sini sang aksidente ini nga nabunggoan sang motorsiklo nga ginamaneho sang suspect/driver nga ginkilala kay Joemar Villanueva y Bajada, 36-anyos, construction worker kag residente sang Barangay Linao, Panay, Capiz.
Bangud sa kabaskugon sang pagkabunggo, nag-angkon sang malubha nga kapilasan sa ulo ang biktima.
Gindala pa ini sang mga nagresponde nga personnel sang Capiz Emergency Response Team sa isa ka pribado nga ospital apang ini ang gindeklarar nga dead-on-arrival.
Ang suspect/driver nga si Joemar Villanueva ang padayon subong nga ginabulong sa Bailan District Hospital sa banwa sang Pontevedra.
