PATAY GID | Isa patay samtang isa pilason sa rambol malapit sa burger stand sa banwa sang Cuartero, suspek isa ka membro sang militar!

Cuartero, Capiz- Patay ang isa ka persona samtang pilason ang isa pa matapos nga ginluthang sang isa ka membro sang Philippine Army sa Poblacion Tacas, Cuartero, Capiz alas 9:30 ang takna sang gab-e.
Ginbawian sang kabuhi ang biktima nga isa ka construction worker nga ginkilala kay Allen Christ Malecosio y Fabuna, 24-anyos samtang padayon nga ginabulong sa ospital ang isa pa ka biktima nga ginkilala kay Joren Hijosa y Padrogane, 23-anyos.
Ginsiling ni SPO4 Richard Franco, Deputy Chief of Police sang Cuartero PNP nga base sa imbestigasyon, yara sa burger stand ang suspek nga si Donald Lisbo y Albay, 29-anyos nga isa ka membro sang militar kaupod ang bayaw sini nga si Jerry Homballas y Protacio sang nag-abot ang grupo sang mga biktima kaupod ang mga abyan nga sanday Bryan Tripoli, Jeremiah Carnan kag Ismael Padrogane.
Posible nga nakursonadahan sang grupo sang mga biktima ang suspek kabangdanan nga nagluntad ang komosyon sa mga ini.
Nagtambag ang suspek apang mangin siya ang ginkastigo man kabangdanan nga naggabot sang armasluthang kag ginluthang ang mga biktima.
Gindala pa sa Dao District Hospital si Allen Christ Malecosio y Fabuna apang ini ang gindeklarar nga dead-on-arrival samtang pilas naman sa natuo nga paa ang naangkon sang biktima nga si Joren Hijosa.
Mga alas 11:30 sang gab-e boluntaryo nga nagsurrender sa mga kapulisan sang Dumarao ang suspek dala ang .45 caliber pistol nga gingamit sa krimen kag ini ang ginturn-over naman sa Cuartero PNP.

Facebook Comments