CAUAYAN, NEGROS OCCIDENTAL – (2nd Update) Igapasaka na sini na adlaw sang Cauayan Municipal Police Station ang kaso nga murder batuk sa isa ka amay nga nagbuno patay sa isa ka lalaki nga iya ginpangimunan sadtong Sabado, November 17 pasado las 9 sang gab-i sa Brgy. Isio, Cauayan.
Ginpahayag sang Deputy Chief sang Cauayan MPS, P/Insp. Noelson Tayong nga base sa ila imbestigasyon, gintuyo gid sang suspek nga patyon ang biktima.
Ang suspek ginkilala kay Dante Vargas, 49 anyos ang edad, residente sang Purok 7, Brgy. Isio, may asawa kag 3 ka mga kabataan.
Nakilala naman ang biktima nga si Jay Singson, 37 anyos ang edad, soltero kag pumuluyo naman sang Brgy. Caliling, Cauayan.
Madumduman nga sadtong Sabado, November 17 pasado las 9 sang gab-i, ang biktima ang nagkadto sa balay sang iya nobya nga ginkilala lang kay Alyas Inday, 37, tumandok sang banwa sang Isabela kag kaingud balay sang suspek.
Lipud sa ihibalo sang duha nga ginsundan gali sang suspek ang biktima kon diin nagsuhot ini sa buho sang lababo.
Nahibaluan nga masanag sa kwarto sang babayi bangud wala nila ginpatay ang suga rason nga kit-anon gid ang ila sini pag loving-loving sang biktima kag didto iya ginbuno ang lalaki nga may patal nga igo sa likod kag rason sang iya kamatayon.
Naga-gwa sa imbestigasyon nga may sekreto nga luyag ang suspek sa nobya sang biktima bangud masami niya ini nga ginahagad nga magkadto sa ila balay kasunod nga ang iya asawa ang yara sa Manila kag naga-trabaho.
Posible pagpangimon ang rason sang pagpatay sang suspek sa biktima nga detained na karon sa custodial facility sang Cauayan Municipal Police Station./dyHB BACOLOD
