Tapaz, Capiz- Patay ang isa ka membro sang 94IB Philippine Army matapos nga ini ang ginluthang sang mismo kaupdanan sa sulod sang ila kampo nga nahamtang sa Brgy. Lagdungan banwa sang Tapaz alas kwatro sang kaanganhon.
Ginkilala ang biktima kay PFC Delio Sebarillo, 37-anyos sang Brgy *Pali*, *Mandurriao*, *Iloilo* City apang nakapangasawa sang taga-Manapla, Negros Occidental.
Gintinguhaan pa nga dal-on ini sa Tapaz District Hospital apang gindeklarar nga dead-on-arrival sang doktor.
Ginsiling ni SPO3 Gallenero sang Tapaz PNP nga nag-angkon sang multiple gunshot wound nga indi magnubo sa 15 ka bilog tuga sang .9mm caliber pistol sa iya paa, likod kag butkon ang biktima.
Base sa inisyal nga imbestigasyon sang kapulisan, una nga ginkuha sang biktima ang armalite sa iya upod agud nga ini na ang magbulos sa ila poste apang ini ang hinali nga gintayaan sang armasluthang sang suspek nga si PFC Sargie Labao y Lopez, 28-anyos sang Brgy. Bato Bato, Mambusao kag ini ang ginluthang.
Nahibaluan nga lunsay ang mga ini membro sang Bravo Company sang 94th Infantry Batallion nga gin-augment lamang sa detachment sang 61st IB nga nahamtang sa amo nga lugar.
Samtang sa interview naman sang RMN kay Mildred Sebarillo, iloy sang biktima nga sang nakaligad nga semana ulihi ang mga ini nagkit-anay matapos nga nagpauli sa ila sa Iloilo ang anak nga si Sebarillo.
Suno pa diri nga wala naman ini sang may nasugid nga may nakaaway sa sulod sang ila kampo. Nabilin sang biktima ang tatlo sini ka mga kabataan.
Samtang matapos ang insidente, bulontaryo naman nga nagsurrender sa iya senior official ang suspek nga si PFC Sargie Labao.
Padayon pa ang maid-id nga imbestigasyon sang mga kapulisan sa amo nga insidente samtang ginahibalo kun anu ang matuod nga ginhalinan kun ngaa ginluthang gid sang suspek ang biktima.
Ginapatihan naman nga may yara sang ginabatyag nga “war shock” ang suspek.
photo © RMN Iloilo FB friend
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
