Nagpadangat sang reklamo sa RMN ang pila ka mga residente sang Barangay Guinhalaran, Silay City matapos nga ila gin-alegar nga may isa ka kagawad kag duha ka mga patay na ang nadala pa sa listahan sa makabaton sang Social Amelioration Program (SAP).
Sa pagpang-usisa sang RMN News sa lugar, ginpanginwala ni Punong Barangay Toti Lopez ang alegasyon nga yara sa listahan ang pangalan ni Kagawad Joel Biñas. Nakit-an mismo sang news team nga wala didto ang pangalan sang nasambit nga kagawad.
Apang, gin-confirm ni Lopez nga yara sa listahan sang SAP beneficiaries si Dante Villarias, nga madugay na nga napatay.
Isa pa gid nga pangalan sang nagtaliwan na ang nalista sa nasambit nga barangay.
Si “Romeo Villarias” nga yara sa official list ang ginpahayag nga patay na apang gin-confirm sang utod sini nga si Ronilo Villarias, nga si Romeo Villarias Sr. ang napatay na man gid kag ang dapat nga yara sa lista amo ang bata sini nga si Romeo Villarias Jr.
Ang bata sang nagtaliwan nga Villarias ang makabig qualified sa SAP suno kay Punong Barangay Lopez.
Sa karon padayon ang pagpang-usisa sang barangay sa kun sin-o ang naglista sa pangalan sang napatay na nga si Dante Villarias.
Ang Barangay Guinhalaran, Silay City ang may yara sang 2578 nga beneficiaries sang nasambit nga ayuda.
