Bukidnon – Nisaka na sa tulo ang patay human na-aksidente ang gisakyan niining jeep sa lungsod sa Quezon, Bukidnon, kagahapon sa buntag.
Sa interview sa RMN Malaybalay ngadto kang PO1 Keven Abendan, ang traffic investigator sa Quezon Municipal Police Station (QMPS) gibutyag niini nga nawad-an ug kontrol ang driver nga si Johnny Salaom, 29 anyos nga taga Brgy. Bugwak, Dangcagan ning probinsya human nag-malfunction ang preno sa iyang gimanehong jeep sa Balangay 1, Poblacion sa mao nga lungsod
Matud ni Abendan nga gikan sa Brgy. Magsaysay ang mao nga jeep ug paingon unta kini sa sentro sa Quezon aron mamahaw ang mga sakay apan nawad-an kini ug control pag-abot sa highway nga bahin.
17 ka pasahero ang sakay sa mao nga jeep diin dead on the spot ang usa ka Jason Gomez, 23 anyos. Samtang nakabsan usab sa iyang hinulamang kinabuhi ang usa ka Ernesto Pajardo, 47 sa Bukidnon Provincial Hopistal – Maramag ug usa ka nagngalang Micheal nga gidala kini didto sa dakbayan sa Davao. Ang mao nga mga biktima pulos lumulupyo sa Brgy. Magsaysay.
Samtang ang mga nasamdan padayon karon nga nagpa-alim sa BPH-Maramag.
