Naglab-ot na sa 16 ang patay sa rabis dire sa probinsya sang South Cotabato halin Enero 1 tubtob Agusto 13 subong nga tuig nga mas mataas sang 700 percent kumparar sang nagligad nga tuig sa kapareho nga period.
Sa datos sang Provincial Epidemiology Surveillance Unit narekord ang patay sa rabis sa banwa sang Banga, Sto. Niño kag Norala nga may tig-isa, tig-4 sa Lake Sebu kag T`boli, 3 naman sa Polomolok kag duha sa syudad sang Koronadal.
Yara naman sa 5-anyos tubtob 70 –anyos ang biktima nga kadam-an mga lalaki.
Samtang dose ukon 75 porsyento naman sang biktima ang nakagat sang ido nga wala napaidalom sa rabies vaccination.
May-angot sini ginaawhag na naman ni Dr. Rogelio Aturdido Jr. Provincial Health Officer sang South Cotabato ang mga pumuluyo sa probinsya nga kon nakagat man sang ido kag anuman nga warm blooded animals ang gilayon nga magkadto sa mga animal bites treatment center tungod alarming na ka tama ang kaso sang rabis sa probinsya.
Makit-an ang mga animal bites centers sa South Cotabato Provincial Hospital, Doctors Clinic and Hospital, Upper Valley Community Hospital sa Surallah, Rural Health Unit sang Tantangan kag Polomolok.
