Wala nay kinabuhi ang usa ka 38 anyos nga lalaki sulod mismo sa iyang kubo didto sa Purok Okra, Brgy. New Sicayab, Polanco sa dihang gisusi sa iyang ig-agaw nga si Bonifacio Omud.
Giila ni PEMS Roderick Baraquero ang biktima nga si Zaldy Omud Toc, nagpuyo sa nahisgutan nga lugar.
Sa gihimong pag imbistiga sa mga pulis sa Polanco, migawas nga nakig inom kini sa iyang mga kaliwat sa miaging adlaw ug sa dihang nahubog na mipauli kini sa iyang pinuy-anan aron matulog.
Matod pa sa iyang ig-agaw nga si Bonifacio namalihog pa kini nga palungon ang iyang suga. Human nga napalong ang suga wala na siya’y nadungog nga kasikas gikan sa biktima nga naghegda sa salog.
Sa paghiling sa doctor, maayong pagka tusok sa ulo sa biktima sa nagsiwil nga lansang nga maoy hinungdan sa wala damhang kamatayon niini.
Gituohan nga wala kini na bantayan sa biktima ang lansang ilabi na nga lango sa ilimnong makahubog.
