South Cotabato—Gikumpirma ni Police Major Romy Castanares ang hepe sa Surallah PNP nga nailhan na kadtong patay’ng lawas sa usa ka lalaki nga nakit-an niadtong adlaw nga Domingo sa buntag sa Tolentino cemetery, Sitio Los Pigados, Barangay Centrala, Surallah, South Cotabato.
Ang biktima giilang si Sebastian Silvano, 72 anyos, lumulupyo sa Digos City.
Sumala pa ni castanares nga mibisita lang matud ang nasampit sa iyang pamilya sa naasoyng munisipyo ug nananghid kini nga muadto sa sementeryo nga nag-inusara aron sa pagduaw sa lubnganan sa iyang inahan apil na ang pagpanghinlo sa lugar ug niadtong higayona posibleng giatake sa kasing-kasing ang nasampit nga miresulta sa iyang kamatayon.
Saysay man usab sa opisyal nga wala silay nakitang foul play sa kamatayon niini gumikan kay basi usab sa gihimong imbestigasyon sa mga personahe sa SOCO sa lugar wala man pod silay nakita nga timailhan sa lawas nga hinungdan sa kamatayon niini.
Pagpaklaro usab ni Castanares nga kadtong mga tawo nga nagbisita sa ilahang mahal sa kinabuhi sa sementeryo ang nakakita sa patay’ng lawas sa 72 anyos hinungdan nga gilayon nila kining gipahibalo sa kapulisan ug nagtuo usab ang pamilya niini nga miuli na sa Digos ang nasampit gumikan kay wala na nakabalik pa sa panimalay sa iyang inahan.
