General Santos City—Nailhan na ang lalaking nakaplagang patay ilawom sa tulay sa may Diversion Road , Barangay Tambler Gensan.
Positibong giila ni Rene Solmayor nga ang nasangpit nga biktima mao ang iyang anak nga si Brian Solmayor, 21 anyos, ulitawo ug residenti sa MC Vill., Barangay Fatima Gensan.
Sumala sa amahan nga wala nakauli ang iyang anak, ila pa kining gipangita ug ila nalang nasayran nga ang nahisgutan diay ang lalaking nakaplagang patay ilawom sa tulay sa Barangay Tambler .
Nasayran nga basi sa inisyal nga imbistigasyon, gituohang naghikog ang biktima pinaagi sa pagsunog sa iyang kaugalingon ayha miambak sa tulay. Giangkon ni Rene Solmayor nga pila nga kahigayon nga nagbahad ang iyang anak nga maghikog.
Usa sa mga rason ang pagkadismaya niini human nga sa pito nila ka managsuon siya ra ang wala makahuman sa pagtuon ug walay trabaho. Nasayran nga mahiubsanon ang iyang anak ug dili modugay sa trabaho tungod dili niini gusto nga makasab-an sa iyang amo.
Giangkon pa sa amahan nga dili nila mabantayan kanunay ang iyang anak tungod siya ug iyang asawa nag bantay sa ilang pwesto sa merkado publiko sa Barangay Apopong.
Sa kasamtangan gipahiluna na sa pamilya ang patayng lawas sa biktima ug wala na usab silay plano nga ipailawom sa otopsiya ang patayng lawas niini tungod sila kumbinsido nga naghikog gyud ang nasangpit.
