General Santos City—usa ka patayng lawas sa usa ka babaye ang nakaplagan nga nag utaw na sa sapa nga sakop sa Purok Kasilak, Silway, Barangay West Gensan.
Alas 6:00 pasado ang takna sa buntag kaganina lang dihang nakaplagan sa batan-ong ginganlan lang ug Jepoy ang patayng lawas sa usa ka babaye nga nasangit sa bato uban ang mga laya nga kahoy ug sagbot.
Wala na ini sapot sa ubos nga bahin ug nagsul-ob na lamang ug bra. Dunay nakit-ang samad sa iyang tiyan ug sa iyang liog.
Sumala ni Jepoy nga nakurat nalang sya dihang iyang nakit-an ang tiil sa babaye nga nanggimaw sa lubog nga tubig sa sapa maong iya kining gireport gilayon sa mga opisyal sa ilang Barangay.
Gibutyag usab ni Kapitan Edgar Acharon nga posibling dili taga Barangay West ang babayeng biktima tungod wala may nareport sa ilang barangay nga dunay namissing sa ilang Barangay. Posibli matud pa nga naanod lang sa lawas sa biktima sa ilang lugar.
Sa inisyal nga imbistigasyon sa Police Station 1, dili pa nila makumperma kung biktima ba sa krimen ang nasangpit nga biktima o epekto lang sa banda-bansa sa iyang lawas samtang kini anaa sa tubig ang samad nga iyang naangkon. Sa karon ang patayng lawas sa biktima, anaa na sa lokal nga ponerarya sa dakbayan sa Gensan.
