General Santos City—nailhan na ang patayng lawas sa usa ka tawong una nang nakoykoyan sa iro sa may LCR ranch, nga nahimutang sa Sitio Cabo, Barangay Bawing ning syudad alas 4:00 ang takna sa hapon kagahapong adlawa.
Positibong giila ni Monico Ukom nga taga Lake Sebu, South Cotabato ang biktima nga si Romeo Sudao, 33 anyos, usa ka gwardya ilawom sa Supreme Security Agency ug nakabase sa LCR Ranch nga nahimutang sa Barangay Bawing.
Sumala ni Ukom nga iyang pag-umangkon ang nasangpit nga biktima. una na kining namissing niadtong petsa 15 sa bulan sa Setyembre. Nasayran nga natingala nalang sila nga wala na makauli sa ilang panimalay ang nasangpit ug dihang ilang gisusi sa mga kaubanan niini sa ilang gibutyag nga wala na nila hikit-e.
Kagabie dihang nakadawat nalang sila ug impormasyon sa kauban sa biktima sa trabaho nga nakalutan ang patayng lawas sa biktima sa lugar hain kini gilubong.
Gibutyag pa ni Ukom nga una nang nakasulti ang iyang pag-umangkon ngadto sa iyang asawa nga matud pa siya ginatripan sa iyang kaubanang gwardya. Tungod niini nagtuo ang pamilya sa biktima nga kaubanan ra sa nasangpit ang mipatay kaniya ug milubong kaniya sa lugar.
