Gipabuthan ug landmine sa grupong New Peoples Army kon NPA ang Patrol Car sa Cabanglasan Municipal Police Station, sa Brgy. Mandaing, Cabanglasan, Bukidnon alas 11:15 sa buntag kagahapon.
Sa interview sa RMN Malaybalay ngadto kang PNP Bukidnon Provincial Director Col. Roel Lami, gibutyag niini nga naghimo ug security patrol ang kapulisan ug gikan naghatod ug pagkaon sa tropa nga nadestino sa checkpoint sa Barangay Cabulohan, apan pagbalik niini gipabuthan kini ug landmine kon Command Activated Anti Vehicle Improvised Explosive Device (IED) sa grupong NPA nga ilawom sa company Malayag SRC 2.
Hinoon sigun ni Col. Lami-ing nga walay nasamdan nga pulis sa mao nga panghitabo apan naka-angkon ug gamay nga damyos ang sakyanan.
Matud sa provincial director nga naka-alerto na karon ang kapulisan sa probinsya ilabina sa lungsod sa Cabanglasan.
Mahinumduman, nga gilabay ug granada ang blocking/checkpoints sa kapulisan nga nahimutang sa Brgy. Cabulohan niadtong niaging gabie nga nag-resulta sa pagka-samdan sa duha ka mga pulis.
Gitawag usab ni Col. Lami-ing nga usa kini ka diversionary tactics ang gihimo sa mga NPA tungod sa kawad-on na sa supply sa pagkaon ug suporta sa bukid.
Sa karon naghimo na ug case build up ang PNP aron mapasakahan na ug kaso ang NPA nga responsible sa mao nga sunod-sunod nga pagpangharas.
