Roxas City, Capiz – Isa ka pagtilipon para sa mga mangungoma kag mangingisda sa Capiz ang igapatigayon subong nga adlaw Abril 11 sa Capiz Gymnasium.
Mangin dinapit nga bisita si Department of Agriculture Secretary Emmanuel Piñol para sa igapatigayon nga “Patubas” ukon Farmers kag Fisherfolks Day nga kalakip sa pre- Capiztahan activities.
Ang “Patubas” ang isa sa mga dako nga hilikuton sa pagsaulog sang ika-118 ka tuig nga pagtukod sang gobyerno-sibil sang probinsya sang Capiz.
Samtang pangunahan man ni Piñol ang paglunsyar sang Production Loan Easy Access (PLEA) kag ceremonial release sang P1.28 milyones nga loan para sa Lonoy Agrarian Reform Cooperative (LARC) sang Barangay Lonoy, Sapian, Capiz kaupod si Agricultural Credit Policy Council Director Alicia Ilagan.
Suno kay Office of the Provincial Agriculturist Information Officer Florie May Castro igalunsyar man ang National Food Month 2019, labing-una nga Capiztahan Summer Cocofestival Event kag ang pag-release sang project fund sang Philippine Coconut Authority para sa ila mangungoma sang lubi.
Suno pa kay Castro nga kalakip sa pila ka mga hilikuton sa amo man nga adlaw ang pagpatigayon sang mga paindis-indis subong sang “Pinaka,” composo kag best indigenous cuisine.
via- PIA6-Capiz
