Ginkakibot ni Mayor Jerry Trenas ang ginhimo sang LGU-Pavia nga gindul-ong nila sa Jaro ang 77-anyos nga nag-positibo sa COVID-19 nga naka-isolate sa balay sini sa banwa sang Pavia.
Suno kay Mayor Trenas nga ginlapas sang Pavia ang protocol kag posible magapangatubang ini sang nagakaigo nga kaso.
Ginpahayag sang alkalde nga dapat ibutang sa quarantine facility ang pasyente kag ginpanugyan niya kay Mayor Luigi Gorriceta nga dal-on ini sa St. Therese MTC Hospital sa tion mangin plastado na ang isolation facility.
Apang sa baylo nga maghulat, gindul-ong sang Pavia LGU ang pasyente sa balay sini sa Distrito sang Jaro.
Dugang pa sang alkalde nga may liability ang LGU Pavia bangud ang ginhimo nila ang lubag sa kagustuhan sang pasyente.
Bangud sini, yara na sa pamilya kon mapasaka sang kaso batuk sa LGU sang nasambit nga banwa.
