Sa interbyu sa RMN Davao kang Commodore Agapito Bibat, CGDSEM Commander gikondena ug gikadismasya nila ang maong binuhatan.
Sumala ni Bibat nga nakatutok usab sila karon sa maong kaso ug wala nila gi-tolerate ang ‘eering personnel’ nga kasamtangang nadestino sa Coast Guard Station Davao Human Resource Management Unit.
Giila ang suspek nga si SN2 Khalid Abdullah, 32 anyos kinsa unom ka tuig na sa serbisyo ug usa ka tuig ng nabalhin sa Davao City.
Subay sa maong insidente, gipahimangnuan ni Bibat ang tanang mga personahe nga ayuhon ang ilahang mga trabaho ug sundon ang standard of service nga gitudlo kanila sa Philippine Coast Guard (PCG).
Mga kasong Human Trafficking, Rape ug Sexual Assault ang atubangon karon sa suspetsado.
Nadakpan ang suspek atol sa entrapment operation sa National Bureau of Investigation XI niadtong Sabado Abril 22, 2023 pasado sa alas-10:00 sa gabie sa may Doña Vicenta Village ning dakbayan sa Davao.
Gibutyag ni Atty. Arcelito Albao, National Bureau of Investigation XI Regional Director nga nidangop sa ilahang buhatan ang 21 anyos nga biktima nga usa ka modelo human kini alegasyong gilugos sa suspek sa kaduhang higayon niadtong Abril 18,2023 sa buntag.
Atol sa Press Conference gisaysay sa biktima nga gi-communicate siya sa suspek sa social media para mag-usher sa giingong aktibidad sa Philippine Coast Guard.
Nisalig kini sa suspek tungod kay nakauniporme kini atol sa ilahang pag-video call.
Kadlawon niadtong Abril 18,2023 gisundo kini sa suspek sa Matina ning syudad apan gidala kini sa Cabantian ug alegasyong gitiunan og baril ug gilugos kini.
Wala pa makontento ang suspek saysay sa biktima tungod sa hulga sa iyahang kinabuhi, wala kiniy nahimo dihang gidala kini sa inn aron didto ipadayon ang dautang buhat.
Nilusad og operasyon ang NBI XI ug nadakpan ang suspek.
Atol sa entrapment operation narekober sa posisyon niini ang mga baril nga Glock 19 Gen5, Glock 9mm, mga bala ug sakyanang sa suspek nga Toyota Hilux.
Samtang, tak-om ang baba suspek sa mga pangutana sa media atol sa interbyu kaniya.
RadyoMaN Aimee Guinita
