General Santos City— Giangkon ni Esmael Hamak, branch manager sa PCSO Gensan nga limitado lang gyud ang ilahang mahimo sa operasyon sa Small Town Lottery kon STL sa gensan gumikan sa napulo lang sila nga empleyado sa dakbayan.
Apan iyahang gipaniguro nga tanang kalapasan nga nahimo sa Trento Gaming And Leisure Corporation sa pagdumala sa STL sa dakbayan ang ilahang ginahatagan ug pagtagad.
Gani miduol na matud pa kanila ang City Permits And Licences Division kalabot sa mando nga kinahanglang anaa lang sa 45 ka mga STL Outlet ang anaa sa dakbayan. Dugang pamahayag ni Hamak nga kung unsa lang ang nakalatid sa Implementing Rules And Regulations kon IRR mao lang ang ilahang ma-kontrol.
Gani dili tanang concerns ang kaya niyang tubagon rason nga uban niini ang ginapadala pa sa main office sa kauluhan aron nga matubag sa mga tag-as nilang opisyal.
Pagpaklaro niya nga ilaha lang ginahimo ang ilahang trabaho isip implementor sa STL apan dili matud pa silay mao naga-desisyon sa operasyon niini. Kalabot niini, gibutyag ni Hamak nga anaa sa 105 ka mga STL outlet ang anaa sa dakbayan base sa impormasyon nga gihatag kanila sa Trento Gaming Corporation.
Pag-angkon niya nga nakurat siya dihang masayran nga anaa lang sa 45 ka mga outlet ang gi-aprubahan ni Gensan City Mayor Ronnel Rivera.
Gumikan base sa pamahayag sa trento, ilaha lang gituman ang resolusyon nga nagtugot kanila nga magtukod ug mukabat sa 105 ka mga outlet nga adunay gilay-on nga 200 metros gikan sa mga tunghaan ug mga simbahan.
