Davao City – Libuan ka mga pamilya sa Davao ug Panabo City ang laumang makadawat sa privilege card system nga proyekto sa Presidential Commission for Urban Poor (PCUP).
Kini ang gibutyag ni Commissioner Norman Baloro atol sa ispeak forum diin matud pa nga anaa sa 3,000 ka mga pamilya ang makabenepisyo niini samtang 1,500 ka mga pamilya gikan sa Panabo City.
Pagpasabot ni Baloro nga ang Davao ug Panabo ang identified nga adunay daghang informal settlers busa mao kini ang unang batch nga makadawat sa privilege card system.
Samtang gibutyag usab sa commissioner nga kinahanglang miyembro ang pamilya sa bisan unsang asosasyon nga accredited sa PCUP ug kinahanglang nalakip sa listahan sa mga informal settlers.
Dugang niini, giingong maka discount og 10% sa plete sa bus, fast food chains, o pagpalit og tambal sa mga pharmacy samtang 20% ang ma-avail sa mga cardholders sa mga mu-enroll sa review centers apan pagpaklaro ni Baloro nga didto lamang magamit ang nagkantidad nga 25 pesos nga card sa mga participating companies.
Gikatakdang ilusad sa PCUP ang privilege card karong umaabot nga Agosto 2019.
RadyoMaN Renz Barbarona
