Sarangani Province- Nagkahiusa ang mga kadagkuang opisyal sa probinsya sa Sarangani sa paghangyo ngadto sa liderato sa Philippine Drug Enforcement Agency kon PDEA nga magpabilin si Director Gil Cesario Castro isip regional director sa PDEA Region 12.
Atol sa regular sesyon sa Sangguniang Panlalawigan niaging adlaw nga Martes, giaprobahan sa mga board member sa pagpanguna ni Vice Governor Elmer De Peralta og giduso ni Board Member Hermie Galzote, ang resolusyon sa maong paghangyo subay na usab sa urgent request ni Governor Steve Chiongbian Solon.
Ang maong lakang ang panagana lang basin adunay mahitabo nga pag-reshuffle tungod na usab kay bag-o ang PDEA director general sa katauhan ni Police Chief Superintendent Aaron Aquino.
Sila sa Sangguniang Panlalawigan og si Governor Solon ang nagpadayag lang sa ilang kagustuhan tungod na usab matud pa sa maayong performance nga gipakita ni Director Castro pagbatok sa ilegal nga druga bisan sa walo (8) ka bulan pa lang niini sa pangatungdanan.
Segun ni Vice Governor De Peralta, mismong ang League of Mayors sa Sarangani, og bisan pa si Senador Manny Pacquiao, ang hugot nga nag-rekomenda nga magpabilin sa pwesto ang PDEA regional director.
