Gidepensa sa Philippine Drug Enforcement Agency kon PDEA Bukidnon ang rason nganong gamay pa ang nadeklarang drug cleared barangay sa probinsya.
Sa interview sa RMN ngadto kang PDEA Bukidnon Agent Patricio Alerta, gibutyag niini nga ang kawad-on sa suporta gikan sa local government unit kon LGU’s ang usa sa mga rason nganong dugay ang pagdeklara sa barangay drug free.
Matud ni Alerta nga kung dili mosuporta ang LGU, PNP, DILG, DOH ug mga barangay officials dili gayod ma deklaran ang barangay nga drug free.
Sigun niya nga mahinungdanon kaayo ang papel nga gihuptan sa matag usa alang sa mao nga katuyuan.
Ang PDEA usab mao lang matud pa ang mo-supervise sa gipanghimo sa mao nga ahensiya sa gobyerno.
Gipasabot niya nga trabaho sa DILG nga motutok sa barangay level u gang DOH mao ang in-charge sa community based drug rehabilitation program. Angayan usab nga i-follow-up sa PNP kung unsa na ang status sa mga tokhang surrenderees.
Una nang gibutyag ni Alerta nga sa 2017 gibana-banang anaa sa 24 ka barangay ang nadeklarang drug free samtang 9 ka barangay ang na clear karong tuiga.
