Davao City – Mas gidoble pa sa Philippine Drug Enforcement Agency (PDEA) Davao Region ang ilang kampanya kontra iligal nga droga palibot sa Rehiyon Onse.
Nasayran nga wa’y hunong nagapaniktik ang mga ahente sa PDEA-XI sa mga lugar nga kusog ang transaksiyon sa mga pushers ug sa mga users.
Halos matag semana, nagalusad og buy-bust operations ang PDEA-XI sa daghang mga lugar sa rehiyon nga nagresulta usab sa pagkasikop sa mga tigpayuhot og iligal nga droga.
Nagtinabangay ang PDEA-XI ug ang nasudnong kapulisan sa rehiyon diha sa paggukod sa mga tawo nga nalambigit sa iligal nga droga sa tibuok rehiyon.
Gawas sa pagkasa sa operasyon, ang PDEA-XI aktibo usab naglusad og education and symposium and seminars sa mga nag-unang tulonghaan sa Davao Region.
Matud ni PDEA-XI spokesperson Noli Dimaandal nga tumong sa education campaign mao ang pagpasabot sa dautang epekto sa droga ngadto sa panglawas ug kaugmaon sa mga estudyante.
Dugang ni Dimaandal nga tuyo usab sa drug symposium mao nga dasigon ang mga batan-on sa paglikay sa paggamit sa droga samtang dili pa ulahi ang tanan.
Daku ang posibilidad nga mawad-an og market ang mga sindikato o dili ba kaha makunhoran ang gidaghanon sa mga users sa iligal nga droga gumikan sa naasoyng mga operasyon.
Positibo ang tigpamaba nga hingpit mapuhag sa ilang ahensiya ang suliran sa droga nga hulga sa kaugmaon sa mga kabataan tungod sa ‘dual approach’ karon sa PDEA.
Malaumon pa ang opisyal nga padayon mutabang kanila sa kampanya ang katawhan pinaagi sa pagpahibalo kalabot sa kalihukan sa mga tigpayuhot og droga sa ilang lugar.
RadyoMaN Joel Viray
