Davao City- Gimonitor sa Philippine Drug Enforcement Agency (PDEA) Region XI ang mga reports karon nga adunay mga party drugs sa Davao City.
Gibutyag ni Atty. Aileen Lovitos, PDEA XI Regional Director sa interview sa DXDC RMN Davao, gipalig-on pa nila ang ilang intelligence gathering batok sa party drugs o ecstacy ilabina ginagamit sa mga social gatherings.
“Daghan ta’g information nga nakuha nga there are party drugs circulating sa Davao City but of course this is still subject to investigation and intelligence build up,” sumala ni Lovitos.
Sumala ni Lovitos, kumpirmadong gikan sa Germany ang nasakmit nga ecstasy niadtong Pebrero atol sa controlled delivery operation, diin duha ka suspek ang nadakpan ug anaa sa P1M ang kantidad niini.
Kasamtangang ginasubay sa mga operatiba ang gigikanan sa party drugs sa mga party goers nga nadakpan sa buy-bust operation sa beach resort sa Barangay Pindasan, Mabini, Davao de Oro.
Kasong paglapas sa Sec. 5,6,7, 13 ug 14 sa RA 9165 ang gipasang-at batok sa 17 ka mga personalidad nga sila nga si Revsan Ethelbert Papay Elizalde, 33 anyos, residente sa Catalunan Pequeño, Davao City nga maoy target sa drug buy-bust operation, lakip na ang 16 ka mga kaubanan niini nga sila Eana Faye Marie Olea, Bryk Jiordan Archival, Kurk Bryan Tiubot, Paolo Guerero, Jomark Aping, Ariel Bueno, Edel Caballero, Ronald Chuan, Fritz Dinopol, Tom Jhun Doblas, Mark Christopher Isip, Janlord Masong, Christopher Prudente, Jesus Ragas III, Giovanni Tabanao ug Jason Viduya.
Sa gipahigayong drug test sa inisyal nga resulta 14 sa 17 sa mga suspetsado ang nagpositibo sa Ecstacy, Marijuana ug Shabu.
Nasakmit sa mga operatiba sa buy bust ang mga capsules o tablets sa ecstacy, LSD, shabu ug mga marijuana nga nagkantidad sa P1.2M.
RadyoMaN Aimee Guinita
