Davao City – Gisuta pa karon sa Philippine Drug Enforcement Agency 11 (PDEA XI) kung igsoon ba sa Mayor sa Malalag nga si Peter Paul T. Valentin ang nasikop nga asawa sa Top 1 municipal level high value target sa DavSur atol sa buy-bust operation sa mga awtoridad.
Sa pakighinabi sa media ka PDEA 11 Regional Director Antonio Rivera, niini nga kun man ugaling mapamatud-an nga igsoon kini sa mayor si Khey Cristine Tabas, nagtoo si Rivera nga nasayud kini sa mga iligal nga buhat sa igsoon niini.
Sumala ni Rivera nga sa Cotabato nag gikan matud pa ang mga iligal nga droga nga ginabaligya ug ginagamit sa mga suspetsado ug nasayran nga ginagamit sa mga suspetsado ang ilang kaugalingong panimalay nga ginahimong baligyaanan ug gamitan sa iligal nga droga.
Sa pagkakaron anaa na sa buhatan sa PDEA XI si Khey ug ginaplastar na ang paghan-ay og kaso batok kaniya.
Kahinumdoman nga naglusad og buy-bust operation ang mga awtoridad sa DavNor pinaagi sa search warrant nga miresulta sa pagka-neutralisa ni Jannel Tabas.
Dugang ni Rivera nga daghan pa sa listahan sa PDEA ang HVT ug magpadayon sa gihapon ang ilang mga operasyon aron batukan kini.
RadyoMaN Jason Amisola
