*Tres persona ya sale arestao durante el dos seguiditos buy-bust operation ya conduci el maga agente del Philippine Drug Enforcement Agency na Sta. Maria del Martes por la tarde.*
*El director regional del PDEA si Lyndon Aspacio, CESE ya habla el primer operacion ya sosede na calsada del Governor Ramos, donde ya resulta na aresto di Benhar Asta y Baksal, 36, casao, de Teresita Drive, San Roque.*
*Ya recobri desde na possession di Asta amo el dos paquete de shabu y el que se llama marked money P500.*
*El seguiente operacion ya conduci na calsada del derechura para na Cabatangan donde ya aresta tambien con el dos man unido canda *Donie Muksan y Suaib, 46 y Carmen Saji y Adam, 36, ambos native de Cuevas Matatag, Lamitan City.
Lo mismo tambien dos paquete de shabu y P500 marked money ya recobri desde canila.
El tres arestao ya lleva dayunna PDEA headquarter pendiente el plantada de caso contra con estos. – Dan Toribio
