Davao City – Natural lang sa dagan sa pamulitika sa Pilipinas ang pagmugna og kaugalingon nga partido o dili ba kaha pagtapot sa laing grupo sa mga politiko kung asa dunay dakong bintaha sa kaugmaon sa political arena.
Daghan sa mga ideologue sa PDP-Laban karon minggawas sa partido ug naglatagaw nga daw walay mga tag-iya tungod sa pagduda sa uban nga wala na sila makasabot sa dagan sa partido.
Daghan sa baguhan nga mga miyembro PDP-Laban karon nga yano ra kaayo nakasulod sa partido gikan sa ilang gikagikanan nga partido pod bisan og wala muagi og tulo ka adlaw nga seminar sa partido.
Suma ni Professor Adrian Tamayo, mao kini ang rason ngano nagmugna og Hugpong ng Pagbabago (HNP) Party si Mayor Inday Sarah Duterte-Carpio kay aron masagop ang mga ideologue nga milayas sa PDP-Laban.
Matud ni Tamayo, giila sa balaod sa Pilipinas ang pagbaton og daghang partido diin ang pagporma ni Mayor Inday Sara og grupo bunga kini sa multi-parties sa atong nasud.
Ang panagbangi karon tali ni Mayor Sara ug sa PDP-Laban secretary general nga si Speaker Pantaleon Alvarez, lig-on nga ebidinsiya sa kamatooran nga adunay presenteng bikil sulod sa ilang partido karon.
Nagtoo si Professor Adrian Tamayo nga sakto si Mayor Inday Sara Duterte-Carpio nga nagbuhat kini og regional party kay nagtubag kini sa backlog sa PDP-Laban pinaagi sa pagsagop sa ilang mga sakop nga migawas kay wala na makasabot sa ilang pamaagi.
Dili kumbensido si Professor Tamayo nga musangko sa political partisan ang pagmugna og regional party ni Mayor Inday Sara inay makatabang pa hinoon kini kang Pres. Rodrigo Duterte batok sa atake sa mga taga-opposition.
RadyoMaN Joel Viray
