Bukidnon – Gisiguro sa Provincial Disaster Risk Reduction and Management Council kon PDRRMC Bukidnon nga andam sila kanunay batok sa hulga sa kalamidad.
Sa interview sa RMN Malaybalay ngadto kang Israel Johan Damasco Jr. ang head sa PDRRMC gibutyag niini nga gawas sa information dissemination nga ilang gihimo kalabot sa disaster awareness and preparedness, andam usab ang ilang buhatan sa augmentation kung adunay lungsod ug siyudad nga manginahanglan sa ilang tabang.
Padayon matud pa kini nilang gihimo tungod kay mandato kini nga gihatag sa ilaha gikan sa Office of the Civil Defense kon OCD Region 10.
Mahinumduman nga gitay-og ang probinsya sa Bukidnon human ang magnitude 5 nga linog sa Valencia City kaniadtong adlaw nga Sabado nga nagbilin ug pipila ka balay nga damyos.
Alayon niini, nanawagan si Damasco sa publiko nga mangandam kanunay ug pabiling magmakalmahon panahon sa kalamidad.
Samtang sa interview sa RMN Malaybalay ngadto kang Jun Valero, CDRRM Officer sa Valencia City gibutyag niini nga nagpadayon karon ang ilang assessment human nga nahitabo ang linog kaniadtong Sabado.
Matud niya nga sa karon misaka na sa 143,500 ang ilang natalang damyos sa muabot 49 ka panimalay, apan giklaro niini nga ang mao nga datus gikan lamang sa brgy. Lurugan sakop sa mao nga siyudad ug dili pa apil niini ang damyos sa Poblacion ug uban pang barangay sa dakbayan.
