Nakatutok karon ang tulo (3) ka opisina sa Provincial Government sa Sarangani – ang PDRRMO kon Provincial Disaster Risk Reduction and Management Office, PVet o Provincial Veterinary Office, ug PHO/Provincial Health Office – inabagan sa mga counterpart niini sa pito (7) ka lungsod ug 141 ka barangay sa tibuok Sarangani Province, aron padayong mapangandaman ang mga kalamidad, lakip na ang hulga sa African Swine Fever nga hinungdan sa kamatay sa mga baboy sa kauluhang Maynila, ug ang hulga usab sa sakit nga polyo nga bag-uhay lang gideklara sa Department of Health nga usa na ka national outbreak.
Sa direktiba ni Governor Steve Chiongbian Solon, sa pagsuporta nila Senador Manny ug Congressman Ruel Pacquiao, Sangguniang Panlalawigan ug mga mayores, gibutyag ni Robert Lubonting, ang operations officer sa PDRRMO Sarangani, nga walay casualty sa nahitabo nga dakong hapak sa balud, kusog nga hangin ug mga pag-ulan atong Septembre 12. May natalang damyos sa mga panimalay ug mga bangka apan zero casualty kini kung tao ang pagahisgutan.
Dako nag kausaban matud pa sa kalihukan sa mga tao tungod sa mga palisiya nga gipatuman sa lokal nga gobyerno, sama sa preemptive and forced evacuation kon paspas nga pagbakwit padulong sa ilang municipal ug barangay gym.
Gikumpirma ni PDRRMO Action Officer Rene Punzalan nga nakapadala na silag food assistance sa kamanduan ni Governor Solon, isip pag-ayuda sa LGU Maasim, sama sa sinakong mga bugas ug mga delata. Ginahisgutan pud matud pa sa munisipyo ang relokasyon ug rekonstraksyon sa mga naapektuhan gawas sa relief assistance.
Samtang, segun ni Lubonting nga gikumpirma kanila sa DPWH nga 100 percent completed na ang Regional Evacuation Center nga nahimutang sa Barangay Tamadang, sKiamba. Gipondohan kinig P35 Milyones ka pesos sa Office of Civil Defense, magamit na kini inig ma-turnover sa musunod nga mga inadlaw alang sa mga mubakwit.
Sa pikas nga bahin, nakatutok pud sa pag-monitor ang opisina sa PVet (pe-vet) o Sarangani Provincial Veterinary Office aron dili makasulod ang virus sa ASF kon African Swine Fever nga daghan nang gipamatay nga mga baboy sa Maynila nagasugod sa pag-kalintura sa baboy. Segun ni Provincial Veterinarian Doctor Joselito Gleyo, wala kini epekto sa lawas sa tao kung makaon apan usa ang tao nga carrier kon makadala sa virus pinaagi sa pagdala sa mga delata ug karneng baboy gikan sa mga nasud nga talamak ang African Swine Fever, maong apil nga ginabantayan ang mga OFW. Nagpabiling ASF-free ang Sarangani apan hugot nilang gipatuman sa gihapon ang mga quarantine measure ug ang information drive aron magiyahan ang mga anaa sa industriya sa babuyan.
Virus pud ang hinungdan nga gideklarang national outbreak ang balatian nga polyo sa DOH tungod may bag-ong naigo niini sa Lanao del Sur ug sa Laguna. Gipanawagan ni Sarangani Provincial Health Officer Doctor Arvin Alejandro ang mga ginikanan nga siguruon nga mabakunahan ang ilang mga kabataan singko (5) anyos paubos. Magpa-alalay matud pa sa mga barangay health workers aron paspas makaapil sa catch-up immunization program. Makuha ang virus sa polyo gikan sa hugaw nga palibot, maong siguruon matud pa nga limpyo ang ginakaon ug ang ginainum nga tubig.
