Subling nagpahimangno ang Provincial Disaster Risk Reduction and Management Office/PDRRMO Sarangani nga ang kahibalo sa pagpangandam ug ang angay nga buhaton ning nasinatian karon nga sunod-sunod nga paglinog sa Mindanao ang magluwas gikan sa kalautan.
Segun ni Mr. Rene Punzalan, ang labaw sa PDRRMO Sarangani, “ligtas ang may alam” matud pa og dili ang pag-panic ang mupatigbabaw sa panahon sa mga kalamidad, hilabi na ning mga nagakusog nga mga pagtay-og. Hinungdan matud pa nga dili mapul-an ang gobyerno sa pagpahigayon og matag quarter nga earthquake drill ug uban pang drill sama sa tsunami drill aron ipasilsil sa huna-huna sa mga tao ang kamahinungdanon sa hinanaling aksyon nga buhaton atol sa aktwal nga pag-igo, sama sa technique nga “Duck, Cover and Hold.”
Magpabiling makalmahon, “presence” of mind,” nakapangita nag luwas nga lugar atol sa paglinog, ug mugawas sa “open space” human na sa pagtay-og aron klaro ang direksyon nga padulngan, inay magdinaganay nga mu-resulta na unya sa pagtinukluray ug pagsakitanay.
Nakapadala na og pasiunang ayuda ang PDRRMO Sarangani ilalum sa Sulong Kaligtasan program ni Governor Steve Chiongbian Solon, sa pagsuporta nila Senador Manny ug Congressman Ruel Pacquiao, Vice Governor Elmer De Peralta ug tanang board member, aron matabangan ang mga residente sa Malungon. Anaa na karon matud pa sa 350 ka pamilya sa Malungon ang anaa gihapon sa mga temporary evacuation center sa mga barangay nga naapektuhan sa 6.9 magnitude nga ni-sentro sa lungsod sa Matan-ao, Davao del Sur atong adlaw nga Dominggo.
Tungod sa lokasyon niini nga boundary sa Davao del Sur, tapad sa Matan-ao, Padada ug kasikbit lugar, nakasinati og mga landslide ang Malungon atong Dominggo, may mga gambalay ang nahugmak partial and totally damaged. Nitala og Intensity 7 ang Malungon. Apan kaluoy sa Ginoo, walay na-report nga nakabsan sa kinabuhi.
Paspas gi-organisa ni Malungon Mayor Tessa Constantino ang Incident Command Post aron hiniusa ang tanang aksyon ug komunikasyon. Nag-emergency meeting pud dayon ang RDRRMC kon Region 12 Disaster Risk Reduction and Management Council aron matabangan sa mga ahensya sa gobyerno ang naapektuhan sa entiro Rehiyon Dose. Gani, nakapadala na og mga ready-for-occupancy tent ang DSWD sarang kapuy-an sa mga nagbakwit human sila ni-desisyon nga biyaan temporaryo ang ilang panimalay tungod sa padayong aftershocks.
Segun ni PDRRMO Head Punzalan, ang mga naapektuhan sa linog atong Dominggo sa Malungon ang kasagaran ang gikan sa upland area, kadtong anaa sa kabukiran nga nakasinati og landslide ug pagliki sa yuta.
Gipaklaro na lamang ni Punzalan nga walay basihan ang gikaingon sa uban nga “man-made” kon hinimuan sa tao ang paglinog. Wala pay instrumento nga naimbento nga maka-detect og linog.
Bisan si DOST Undersecretary ug Phivolcs Director Renato Solidum ang nagbutyag sa iyang pagbisita sa Davao del Sur, nga walay aktibidad sa tao ang makakaya sa pagmugna sa maong gikusgon sa pwersa nga makapatay-og gikan 3 kilometros ilalum sa yuta. Ang 6.9 magnitude nga linog matud pa ang katumbas sa 30 units sa nuclear bomb nga gihulog sa mga eroplano sa Amerika didto sa Hiroshima, Japan panahon sa World War 2.
Gibutyag pa ni Director Solidum nga ang fault line nga nilihok sa maong 6.9 magnitude atong Dominggo mao ang Tangbulan Fault, mao kini ang fault line nga 69 kilometros ang gitas-on gikan Davao del Sur paingon sa Davao Oriental.
Wala gipangayo nga mulihok ang 65 kilometros nga fault line sa Malungon paingon sa Makilala, North Cotabato apan angay kining pangandaman tungod kay kaya matud pa kining mu-produce og 7.2 magnitude.
Ang pag-ampo sa Kahitas-an gawas sa pagpangandam ang bugtong hinagiban natong mga katawhan.
