Subling nagpahimangno ang PDRRMO kon Provincial Disaster Risk Reduction and Management Office sa probinsya sa Sarangani nga magpabiling makalmahon kung adunay masinatian nga mga paglinog.
Dili dapat matud pa kalimtan ang mga gitudlo sa matag quarter nga pagpahigayon og earthquake drill, ug kana mao ang technique nga “Duck, Cover and Hold.” Kalmado ug dili mudagan aron dili na hinuon ma-disgrasya. Gikinahanglan lang ang “presence of mind” samtang ginagunitan ang ulo. Mangitag luwas nga lugar nga pulidong maka-cover sa ulo ug sa lawas samtang nagpadayon ang pagtay-og. Ayha na mugawas kung stable na ang palibot.
Padayon pa nga gina-monitor sa PDRRMO Sarangani sa pagpanguna ni PDRRM Officer Mr. Rene Punzalan kung adunay damyos sa nahitabo kagabii nga 6.3 magnitude nga linog nga ni-sentro sa Tulunan, North Cotabato. Nideklara nag suspensyon sa klase sa tanang ang-ang sa eskwelahan ang mga munisipyo sa Sarangani Province, pinaagi sa mga municipal mayor, aron tagaan og dakong higayon ang disaster ug engineering team nga mu-inspeksyon sa mga gambalay sa tulunghaan lakip na sa uban pang imprastraktura ug mga vital installation.
Gipaklaro sa PHIVOLCS nga walay nahitabo nga tsunami alert apan magpabiling magbinantayon ang mga katawhan sa gilauman nga mga aftershock.
Gisiguro sa PDRRMO Sarangani nga magpabilin silang alerto kauban ang mga MDRRMO sa pito (7) ka munisipyo ug ang ilang mga counterpart sa kabarangayan ubos sa kamanduan ni Governor Steve Chiongbian Solon sa iyang Sulong Kaligtasan program ug sa mga mayores, sa pag-ayuda nila Senador Manny ug Congressman Ruel Pacquiao, Sangguniang Panlalawigan ug mga barangay kapitanes.
