Davao City – Gidayeg sa kanhi membro sa Government of the Republic of the Philippines (GRP) Peace Panel ang gihimo nga mga lakang ni Pres. Rodrigo Duterte kabahin sa planong pagpabalik sa peacetalks tali sa New Peoples Army (NPA) ug sa gobyerno sa Pilipinas.
Si Ednar Dayanghirang, kanhi membro sa GRP Peace Panel, nagbutyag nga kung tumanon lang sa mga rebelde ang gipasidaan ni Pres. Duterte sama sa pag-undang sa revolutionary tax, pagpangataki ug pagpangsunog, daku ang posibilidad nga maundang na sa hingpit ang insurhensiya denhe sa nasud.
Una niini gisulti ni Dayanghirang nga sa ilang probinsya sa Davao Oriental, wala nay mga nahitabong engkwentro tali sa sundalo ug rebelde tungod kay misuporta na ang naulahi sa kasamtangang gobyerno.
Samtang giklaro usab ni Dayanghirang, ang paghatag og deadline ni Pres. Duterte iyaha kining taktika isip kabahin sa paningkamut aron subling mapadayon ang panghinabing kalinaw.
Tungod niini malaumon siya nga makab-ot na ang kalinaw tungod sa gihimong mga paningkamut sa pangulo tali sa mga rebelde.
Samtang gitataw usab ni Dayanghirang nga ang problema sa insurhensiya, dili masulbad pinaagi sa giyera kondi sa politikal ug socio-economic development aron wala nay magrebelde.
RadyoMaN Bernard Pantallon
