Davao City – Gibarugan sa grupong Alliance for Nationalism and Democracy ( ANAD) nga wala gihapoy pulos ang pag-abli pag-usab sa pultahan sa hisgutanang pangkalinaw alang sa CPP-NPA-NDF nga ang pagkab-ot sa hingpit nga kalinaw maoy ilog sa gahom gikan sa kasamtangang gobyerno ug pagbungkag sa demokrasya gamit ang ilang armadong pakigbatok.
Matud ni ANAD media officer Arthur Tariman, walay tingoha ang teroristang CPP-NPA-NDF nga humanon ang ilang pakigbisog sanglit ang ilang pinakatumong sa pag-alsa mao ang pag-ilog sa gahom ug pagpuhag sa gobyerno ug demokrasya aron sa ingon ila nang matukod ang panggamhanang komunismo nga buot nilang ma-establisar dinhi sa nasud.
Gihingusgan ni Tariman nga igo lang gamiton sa mga kaaway sa estado ang peace talk aron undangan sila og giyera sa tropa sa gobyerno diin mao sab kini ang ilang kahigayonan sa pagpakusog pag-usab sa ilang puwersa sa armado nga sa karon nagkahuyang na human naapektohan sa Executive Order 70 nga gipagula ni Presidente Rodrigo Duterte nga nagtumong sa pagtapos sa CPP-NPA-NDF dinhi sa Pilipinas.
Nagpanikad si CPP-NPA-NDF founding Chairman Joma Sison ug ang iyang kaalyadong mga militante nga mabalik ang peace talk kay ila nang nabati ang epekto sa EO 70 human namatikdan ang hinay-hinay nga paghuyang sa ilang puwersa sa armado ug paghubas sa ilang masa sulod sa kapin tulo ka tuig.
Duha ka matang sa pamaagi ang gigamit sa mga komunista diha sa pagbungkag sa gobyerno ug sa demokrasya kini mao ang armado ug legal nga pakigbisog apan ang unang istratehiya maoy ilang giduso nunot sa pagtoo nga mao kini ang maayong paagi aron ilang hingpit ma-ilog ang gahom sa kagamhanan.
Busa alang kang Tariman, angay unahon sa gobyerno ang pagbungkag sa armadong militar kun NPA ug kung makita na nga matuldukan na ang arm struggle dinha na magdisidar ang kagamhanan nga makig-istorya og kalinaw sa CPP-NPA-NDF sama sa gibuhat sa gobyerno sa Malaysia niadtong 1960’s.
Migawas nga nadisbintahaan ang gobyerno sa nakalabay’ng mga peace talk kay samtang nag-istorya sa kalinaw ang mga armado usab sa mga komunista gapangatake sa mga kampo sa militar ug kapulisan, gapanunog og mga kompanya, ug gapamatay og mga sibilyan hilabi na sa mga lumad nga supak kanila.
Gani, gikan sa administrasyon ni Cory Aquino hangtud kang Duterte ang mga dagkong opisyales ug mga lideres sa komunista nga nadakpan sa mga otoridad ang napagawas sa prisohan ug naglisod karon ang kagamhanan sa pagsikop aron mabalik sila pag-usab sa prisohan.
Dugang sa ANAD Media Officer, hangtud dili inaog ang mga armas ug undangon ang pakiggiyera sa mga NPA sa kasundalohan ug kapulisan ug sa katawhang Pilipino, mahulog gihapon nga walay padulngan nga maayo ang hisgutanang butang nga angay hinuklogan og maayo sa Duterte Administration.
RadyoMaN Joel Viray
