i Balita
March 26, 2020
(Photo from web)
PECO, INUTDAN LIWAT BANGUD NADAKPAN NGA NAG JUMPER LIWAT SANG ILA KURYENTE
Gin-utdan liwat sang kuryente sang MORE Power Iloilo ang PECO bangud nadakpan ini nga liwat nga nagtakod sang kuryente direkta sa poste sa dalan General Luna nga wala sang kuntador.
Suno sa MORE Power, mga alas 3 sang hapon sang Marso 25, gintakod sang mga tawo sang PECO ang linya sang kuryente sa poste sa kilid sang staffhouse sini.
Bangud sini, ginpablotter sang MORE Power paagi sa ila legal officer nga si Atty. Allana Mae Babayen-on ang inobra sang PECO.
Suno kay Atty. Babayen-on nga makabig na nga pagpangawat sang kuryente ukon paglapas sa Anti Electric Pilferage Act ang inobra sang PECO kag ila personnel.
Ginapreparar na man sang MORE Power ang pagpasaka sang kaso kontra sa mga ini.
Madumdoman nga una gin-utdan sang kuryente sang MORE Power ang PECO building sang nagligad nga sabado bangud natukiban nga wala ini sang kuntador.
Suno sa MORE Power nga dapat na magbayad sang kuryente ang PECO bangud indi na sila ang lehitimo nga Distribution Utility kag kinahanglan nila nga mag-apply sang kuntador sa MORE Power agud marecord ang ila ginakonsumo nga kilowatt hour.
MORE Power na ang lehitimo ukon legal nga Power Distributor sa syudad sang Iloilo bangud ini ang may prangkisa kag Certificate of Public Convenience and Necessity.
