Sa interview sa DXDC RMN Davao kang Dr. Kris Claudette Trangia, Medical Officer IV sa DOH XI, iyang gitin-aw nga kining maong mga pedia cases sa HIV, cumulative kini o natala gikan pa niadtong 1993 hangtod na niadtong December 2023 sa kinatibuk-ang Davao Region.
Gipasabot nga kini nga mga kaso posibleng vertical transmission gikan sa inahan nga infected sa HIV nga wala mipailawom sa Anti-Retroviral Treatment o ART.
Subay niini, buot pakusgan sa DOH XI ang panawagan nga angayang timan-an sa tanan ilabi na sa mga ginikanan ang importansya sa HIV testing aron malikayan ang pagkaylap pa sa maong balatian.
“Gusto lang nato ipaabot sa publiko nga naay other modes of transmission aside sa pakighilawas. Maong gina-awhag nga magpatest para mahibal-an nila ang ilang status, ma-diagnose ug sayo ug mahatagan ug saktong tambal,” awhag pa ni Dr. Trangia.
