Davao City – Giyam-iran lamang karon ni Barangay 37-D Captain Rebecca Diong ang katarongan sa mga batan-ong kababayen-an nga usa lang ka fashion kun uso ang pagsuot og shorts ning panahon sa summer kun ting-init nga halos makita na ang tinipigang parte sa lawas.
Dili pasado kang Diong ang rason sa mga batan-ong babaye nga fashion ang ilang tuyo ug dili pagpromotar sa yutan-on ug lawasnong kalipay sa mga kalalakin-an sa ilang pagsuot og short nga pakigol.
Alang kang Diong, bahala’g tawgong kinaraan ug tiniguwang ug ulahi na sa istilo sa sinuotan basta respetado lang sa komunidad dili sama sa pipila ka mga millennials nga walay pagtahud nga madawat gikan sa kalalakin-an gumikan lagi kay mosul-ob man sila ug shorts nga pwerteng mobu-a nga daw halos wala nay tela.
Segun sa kapitana, ang pagsuot og shorts nga halos makita na ang sensitibong parte sa lawas sa babaye maka-engganyo sa ubang lalake sa pagyaga-yaga, pagpanitsit o pag-molestiya sa babayeng mahilig mupakita sa ilang mga pa-a tungod sa kagu-ot ug kamubo sa pang-ubos nga sinina.
Gipaboran karon ni Diong ang gihimong lakang sa konseho sa dakbayan sa Caloocan diha sa pagpanday og ordinansa nga magdili sa mga babaye nga magsuot og ‘pakigol-style’ o ‘pekpek shorts’ ilabi na diha sa mga pampublikong lugar.
RadyoMaN Joel Viray
