Davao City – Giklaro sa National Police Commission-Davao Region (NAPOLCOM XI) nga wala silay kagahum sa paghatag og kumento kung angay bang tugtan ang mga barangay officials nga makabaton og ‘permit to carry’ alang sa ilang mga armas.
Giingon ni NAPOLCOM XI Officer Norge Castillon nga magdepende gihapon sila sa mga dokumento nga isumite sa PNP ugaling ipursige ang maong plano.
Hilabi na karon nga ubos sa balaud-militar ang Mindanao ug kini nagpasabot ang mga awtoridad lang ang dunay katungod magbaton og ‘permit to carry’ samtang ang mga sibilyan dili puwede.
Nasabtan ni Castillon nga delikado gyod ang kinabuhi sa mga opisyales tungod sa ilang trabaho apan wala usab kini nagpasabot nga dili na subayon ang proseso sa balaud diha sa pagkuha og PTC.
Dili kumbinsido si Castillon sa punto nga delikado ang kinabuhi mao nga tugtan na lang silang magdala dala ug armas.
Tambag karon ni Castillon sa mga barangay officias nga amiguhon ug dili kontrahon ang mga tawo sa ilang barangay tupad sa hugot nga implementasyon sa atong mga balaud.
RadyoMaN Joel Viray
