Planted! Mao kini ang gipagawas karon nga depensa sa abogado ni architect Galua isip kabahin sa pagpaningkamot niini nga mabasura ang complaint nga gipasaka sa mga police batok kaniya.
Matud pa sa sa abogado ni Galua nga si kanhi Misamis Oriental prosecutor Arturo Ubaub nga buhat buhat lamang ang storya batok sa architect.
Duha lang matud pa ka pusil ang gipanag-iya ni Galua ug nga kini mga lisensyado usab, usa ka 9mm pistol ug usa ka .45 caliber pistol.
Tungod niini matud pa ni Ubaub nga ang uban pang mga armas nga nakuha atol sa raid sa balay ni Galua sa uptown Cagayan de Oro niadtong niaging semana ang matud pa mga planted.
Kahinumduman nga usa ka team sa CIDG ang nakakuha ug pipila ka mga armas sa balay sa 43 anyos nga architect nga naglangkob sa duha ka hand grenades, duha ka .45 caliber pistol, usa ka 9mm pistol, usa ka .38 pistol, mga bala, M-16 magazines ug usa ka bolo.
Bag-ohay pa lamang nga gikonsidera sa mga otoridad si Galua isip “person of interest” sa nagpadayon nga imbistigasyon sa nahitabong pagpatay niadtong Dec.2, 2017 kang University of Science and Technology of Southern Philippines president nga si Dr. Ricardo Rotoras.
