Dumarao, Capiz – Dakop sang mga kapulisan sa banwa sang Dumarao ang isa ka persona nga nagapataya sang Small Town Lottery ukon STL sa Poblacion, Ilaya sa amo nga banwa alas 4:30 kahapon sang hapon.
Ginkilala ang suspetsado kay James Galanza y Adorable, 29-anyos sang Brgy. Codingle, Dumarao kun sa diin nakuha sa iya mga kamot ang lima ka bundle sang kutiho kag isa pa gid nga kutiho nga may pangalan sa Five Star Entertainment and Gaming Corporation.
Maluwas diri, nakumpiskar man sa amo nga persona ang P1,300 pesos nga cash kag ID card nga iya sang STL.
Sa impormasyon nagikan Dumarao PNP, natigayon nga madakpan si Galanza matapos nga nakabaton sang reklamo ang mga kapulisan nga illegal ang pagpataya sini.
Magapangatubang sang kaso nga pagbayolar sa P.D. 1602 as amended by R.A. 9278 ang amo nga persona.
