Roxas City, Capiz – Yara na subong nakahunong sa karsel sang Roxas City PNP ang isa ka persona nga suspek sa pagpangkuha sang traysikol sa Barangay Cabugao, Roxas City.
Ginkilala ang suspetsado kay Jhon Balgos, yara sa legal nga pang-edaron kag residente sang Malipayon Village Barangay Tiza, Roxas City.
Suno sa tag-iya sang traysikol nga si Angelo Aponesto, natalupangdan sang bayaw sini takna ala 1:20 sang magaaga nga wala na sa ginaparkingan nga lugar ang traysikol kag nakit-an nga ginatulod sang apat ka mga persona padulong sa direksyon sang Lanot, Roxas City.
Dali-dali ang mga ini nagpangayo sang bulig sa mga himata kag ginlagas ang mga suspek.
Nagpalagyo ang mga ini kag naglumpat sa uyapad apang si Jhon Balgos ang ila nadakpan samtang nakapalagyo ang tatlo sini nga mga kaupdanan.
Ginahibalo pa sa subong sang mga kapulisan ang identity sang upod sang suspek.
