Roxas City, Capiz- Arestado ang isa ka persona sa ginkasa nga buy bust operation sang mga kapulisan pasado alas 4 sang hapon sa isa ka lodge sa Brgy VIII Roxas City.
Ginkilala ang subject person kay Jose 2R Sumeran y Ligazpe, 41-anyos ang pang-edaron sang Poblacion Dumarao, Capiz.
Hugot naman sini nga ginpanginwala nga sa iya naghalin ang narekober nga duha ka sachet sang suspected shabu.
Magluwas diri nakuha man sa iya ang cash nga 340 pesos, 500 pesos nga buy bust money kag cellphone.
Siling ni Sumeran, may ka-textmate ini nga babaye kag nahisugtan nila nga mag check-in sa lodge apang nakibot na lamang ini sang siya na ang ginpaidalum sang mga kapulisan sa buy bust operation.
Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang amo nga persona.
