General Santos City–Nagpadayon pa ang ginahimong imbistigasyon sa kapulisan kalabutan sa pagpamusil patay sa kanhing priso nga nailang si Gabriel Demata, hingkod ang panuigon, residenti sa Purok 3, Rajah Muda, Barangay Bula, Gensan human kining gipusil sa wala mailhing suspek alas 6:45 ang takna sa gabie atubangan sa usa ka tindahan sa maong lugar.
Gikumperma ni Police Sr. Inspector Raul Supiter, City PNP Director sa Gensan City Police Office nga kanhi nang napriso si Demata sa Davao Penal Colony kon Dapecol tungod sa kasong murder, nabalhog usab kini sa Gensan City Repormatory Center gumikan sa kaso sa droga.
Nakagawas kini sa bilangguan human sa pipila ka tuig apan subling nabalik sa pipila ka mga kaso sama nalang sa Carnapping ug uban pa. Daan na usab nga nakadawat ug bahad sa iyang kinabuhi ang biktimang si Demata.
Nasayran nga human kining nakagawas sa prisohan pila na ka tuig ang nakalabay, gisuwayan na kini ug pusil sa wala mailhing suspek apan swerte nga wala mibuto ang pusil. Posibleng giatngan na daan ang suspek didto sa ilang lugar ang biktima ug dihang migawas kini aron sa pagpalit ug sigarilyo didto na kini gipusil nga hinungdan sa iyang kamatayon.
