Davao City – Nakadawat na matud pa og daghang hulga sa kinabuhi ang giingong manager o franchisee sa RTM Investment Scheme kinsa gipusil-patay Lunes sa hapon sa may Purok 3, Peñano St., Brgy. Calinan Proper, Davao City.
Sa interbyu sa RMN Davao kang Davao City Police Office spokesperson Police Capt. Nolan Tagsip nga personal grudge ang gilantaw nga motibo sa pagpatay sa biktimang si Elizabeth Mantalaba, 29 anyos nga taga- Purok 2, New Visayas, Panabo City.
Matud ni Tagsip nga nagpa-blotter na ang maong biktima sa Panabo PNP subay sa nadawat niining mga death threats pinaagi sa texts.
“Niadto siya’g Davao for safeguard siguro. Ang scheme man gud nila is mag-promise nga they will give 3x to 5x return of investment sa gihatag nila nga kapital. Naay mga members nga nabayaran ug naa puy wala, we are looking into the possibilites nga it could be mga grudges ni sa mga wala nabayaran,” matud ni Tagsip.
Lakip sa subayon karon sa imbestigasyon sa Davao Police ang mga possible persons of interests kinsa parte sa nasangpit nga investment scheme.
Blangko pa ang kapulisan sa sa identity sa riding in tandem nga mga suspek.
“As of karon naga-conduct pa ta’g thorough investigation on this. Gina-check pa pod nato kung naay CCTV. Rest assured we are exhausting all means,” segun ni Tagsip.
Nakahiagom ang biktima og duha ka pinusilan sa iyahang ulo hinungdan sa iyahang kamatayon.
Narekober sa crime scene ang basyo sa .45 kalibre sa pistola.
RadyoMaN Aimee Guinita
