Davao City – Personal nga bangi ang gitutukan karon nga anggulo sa imbestigasyon sa Tagum City Police Office sa pagpusil patay kang Atty.Connie Villamor kagahapong adlawa.
Mao kini ang gikumprima ni TCPO Investigator Police Inspector Jeffrey Bangcas atol sa pakighinabi sa DXDC RMN Davao ngadto kaniya.
Suma ni Bangcas nga nagsilbing retainer ug consultant sa usa ka banana company ang biktima ug posible dunay gikabangi si Villamor nga tawo o grupo samtang naghimo kini sa iyang trabaho sa kumpanya.
Apan daling gitataw sa opisyal nga wala pa sila’y gikunsidera nga person of interest o suspek nga maoy nagpatay ni Villamor.
Hinoon, wala pa hingpit gipadaplin ang anggulo nga bangi sa negosyo apan sa karon layo pa kini sa ilang teyorya.
Giingon pa ni Bangcas nga planado ang pagpatay kang Villamor kay na-pattern sa mga suspek ang rota sa biktima matag adlaw.
Busa nagtoo ang opisyal nga hired-killer ang mga suspek kinsa nakamotor ug nagsuot og helmet diin ang mga testigo naghulagway sa mga mamumuno nga dili tanto dako ang panlawas niini.
Kahinumduman, si Villamor kinsa gikan sa balay ug mupaingon na unta sa iyang gasolinahan sa Maco dihang gibanhigan sa riding-in -tandem resulta sa kamatayon usa sa mga dalan sa Tagum City 8:00 sa buntag.
RadyoMaN Joel Viray
