NAKIGHIUSA ang Provincial Government of Bukidnon (PGB) sa pagdasig sa Department of Health (DOH) ug Department of the Interior and Local Government (DILG) sa tanang katawhan sa nasud nga magkugi sa pagbatasan sa BIDA Solusyon aron nga magpabiling luwas batok sa COVID-19 karong panahon sa Pasko ug sa nagsingabot nga bag-ong tuig.
Ang BIDA Solusyon sa DOH nagpasabot sa Bawal ang walay mask, Isanitize ang kamot, Dumistansya sa usa ka metro ug Alamin ang ensaktong impormasyon, ubos sa tema: “Tuloy ang Paskong Pinoy sa Pag-iingat ng Lahat”.
Gipakanaug usab ang usa ka direktiba alang sa tanang local chief executives sa hugot nga pagsunod sa gilatid nga pahimangno sa DOH aron masaulog ang mga nanganlang okasyon nga luwas ug ipahinumdum sa publiko sa pagsunod sa mga lakang sa pagpaminus sa peligro, nga mao ang mosunod: Iwas-Paputok, Healthy nga Handaan, BIDA ang pagsaulog, ug Luwas nga regalo.
Tinguha niini nga ma-edukar ang tanang pamilyang pinoy ug ibatasan ang nasangpit nga mga lakang, ilabi na ang pagmatngon sa minimum public health standards samtang magsadya sa espesyal nga okasyon.
Hugot gipanawagan sa maong mga ahensya sa DOH ug DILG, uban sa Pangagamhanang Probinsyal sa Bukidnon nga ipadayon ang pagka-mabinantayon ingon man ang pakighiusa sa pagkontra sa COVID-19.
