Handa na ang PhilHealth Region VI sa pagpatuman sang Universal Health Care Law ukon UHCL sa masunod nga bulan.
Ini ang ginpat-od ni PhilHealth-6 Acting Regional Vice President Janet Monteverde sa ginhiwat nga press conference bilang preparasyon sa pag-implementar sang nasambit nga kasuguan.
Ginhatagan pagtamod ni Monteverde nga kabahin sang ila pagpanghanda ang pagpatigayon sang malapnagon nga information dessimination kag isa na diri ang pagpahibalo sa media.
Nagalaum si Monteverde nga sa bulig sang media kag sang mga Information Officers sang nagkalain-lain nga ahensya sang gobyerno, mapalab-ot sa publiko ang mga benepisyo nga mahimo ma-avail sa idalum sang Universal health care.
Nahibaluan nga ginpirmahan ni Presidente Rodrigo Duterte sang Pebrero 20 ang Republic Act ukon RA 11223 kon sa diin nasaad diri nga mangin automatic na nga miyembro sang Philhealth ang tanan nga Pilipino.
Sa karon, ginahulat pa sang Philhealth Region 6 ang ginadihon nga Implementing Rules and Regulations ukon IRR sang nasambit nga kasuguan.
