Gibutyag ni Dr. Jayson Ibañez, PEF Director for Research and Conservation ng gipaniguro sa buhatan nga mabalhin sa mas luwas nga lugar sa hinanaling panahon ang mga breeding eagles nunot sa hulga sa bird flu outbreak, human disturbances ug uban pang hulga.
Lauman nga mabalhin ang unang batch sa agila sa ikatulo o ikaupat nga semana sa Marso.
Gihimo sa PEF ang maong lakang subay usab sa komemorasyon sa World Wildlife Day (WWD) karong Marso 3 aron masigurong luwas ug mapanalipdan sa mga hulga ang national bird.
Gipahibalo sa PEF nga dili kini abli sa publiko ug strictly limited ra kini sa mga animal keepers.
Gitugotan sa City Government ang PEF nga gamiton ang 13 hectars gikan sa 105-hectare Eden Tourism Reservation Area para sa site nga bag-ong kapuy-an sa mga agila.
Nagpadayon usab ang pagpangalap og pondo ug nagawhag usab sila og mga donors para sa P26 million nga gikinahanglang pondo para sa breeding sanctuary.
Matud sa PEF, magpabilin sa Philippine Eagle Center sa Malagos ang mga non-breeding Philippine Eagles kung diin masayod ang katawhan sa maong langgam ug sa uban pang rescued ug rehabilitated nila nga mga wildlife.
RadyoMaN Aimee Guinita
